.

പൊയ്മുഖങ്ങൾ...

ഈ മുഖംമൂടി-

എനിക്കു സമ്മാനിച്ചത്-

നീയായിരുന്നു..

എനിക്കിന്നത് നന്നായി ചേരുന്നുമുണ്ട്.

എന്റെ മുഖത്തെ വിഷാദഭാവം,

എന്റെ കണ്ണുകളിൽനിന്നും ഊർന്നിറങ്ങിയ

നീർച്ചാലുകൾ,

അടിപ്പാടുകളാൽ വിക്രിതമായ മുഖം

എല്ലാം എനിക്കിതിന്നടിയിൽ

മറച്ചുവെയ്ക്കാം..

ഉള്ളിലെരിയുന്ന ലാവാപ്രവാഹം

കണ്ണുകളിലൂടെ,കവിളിലൂടെ-

ചാലിട്ടൊഴുകുമ്പൊഴും- 

എനിക്കു ചിരി പൊഴിക്കാം

കടലുപോലെ...തിരകൾ പോലെ..

മൗനത്തിന്റെ വഴിത്താരകളിൽ

നാമറിഞ്ഞ മുളങ്കാടിന്റെ മധുരാരവം,

ജന്മാന്തരങ്ങൾ തേടിയലഞ്ഞ-

ഉറങ്ങാതുണർന്ന രാവുകൾ,

നിലാവിലൊഴുകിനടന്നൊരായിരം

മണലെഴുത്തുകൾ,കിനാവുകൾ...

എല്ലാം...എല്ലാമിനി മറച്ചുവെയ്ക്കാം

പൊയ്മുഖങ്ങൾ..

എല്ലാം വെറും പൊയ്മുഖങ്ങൾ..